राष्ट्रिय प्रजातन्त्र पार्टी मकवानपुरले हेटौँडामा चुनावी सभा गर्ने

बैशाख २५ मा राष्ट्रिय प्रजातन्त्र पार्टी मकवानपुरले हेटौँडामा चुनावी सभा गर्ने जनाएको छ । स्थानीय तहको आसन्न निर्वाचनको प्रचार प्रसारको लागि राप्रपाले २५ बैशाखमा आमसभा गर्न लागेको हो ।

पार्टी केन्द्रीय अध्यक्ष राजेन्द्र लिङ्देनले सभालाई सम्बोधन गर्ने तयारी भएको राप्रपा मकवानपुर प्रवक्ता विशभ अधिकारीले जानकारी दिए । 

उनले अध्यक्ष लिङ्देनले उम्मेदवारहरू र कार्यकर्ताको हौसला बढाउनको लागि आमसभा गर्न लागेको बताए । राप्रपा मकवानपुरका अनुसार आमसभामा पार्टी प्रवेश कार्यक्रम समेत रहेको  छ ।

राप्रपाका तर्फबाट हेटौंडा उपमहानगरपालिकाका मेयरका उम्मेदवार दीपकबहादुर सिंहले मकवानपुरमा आफ्नो पार्टीको जित सुनिश्चित भए पनि कार्यकर्ताको माग सम्बोधन गर्न अध्यक्ष लिङ्देनलाई महासभामा बोलाइएको बताए ।

प्रवक्ता अधिकारीले आमसभामा राप्रपाका केन्द्रीय नेताहरु,प्रदेश नेताहरु तथा जिल्ला नेता तथा कार्यकर्ताको उपस्थिती रहने बताएका छन्।