मेलम्चीको पानी वितरणका लागि आवश्यक तयारी पूरा

काठमाडौं उपत्यका खानेपानी लिमिटेडले मेलम्चीको पानी वितरणका लागि आवश्यक तयारी पूरा गरेको छ । आइतबार बिहानसम्ममा मेलम्चीको पानी महाँकाल चौरमा आइपुग्ने बताइएको छ ।

लिमिटेडका प्रमुख कार्यकारी अधिकृत मिलन शाक्यले गत वर्षको अनुभवका आधारमा पानी वितरण गरिने र गत वर्ष वितरण हुन नसकेका ठाउँमा पानी वितरण गरिने बताए। गत वर्ष सडकले अनुमति नदिँदा मर्मत गर्न ढिला भएको थियो । उनले भने, “सडक खन्नासाथ तत्काल मर्मत गर्न नपाउँदा ढिला हुन्छ । मेलम्ची खोलाबाट १७ करोड लिटर पानी ल्याउने भए पनि अहिले तत्काल थोरैबाट सुरु गरिने तयारी गरिएको छ ।" अहिले सुरुमा पाँच करोड लिटर पानी ल्याइने र विस्तारै बढाइने उनले बताए ।