सन् २०२१ मा मौसमी घटना का कारण लाखौं मानिस प्रभावित

यस वर्ष जलवायु परिवर्तनबाट उत्पन्न मौसमी घटनाका कारण लाखौं मानिस प्रभावित भएका छन् भने अर्बौं डलर बराबरको क्षति भएको विवरण सार्वजनिक भएको छ । बीबीसीले जनाए अनुसार क्रिश्चियन एड नामक संस्थाले तयार पारेको एक प्रतिवेदनमा २०२१ मा मौसमी प्रकोपबाट लाखौं मानिस प्रभावित भएका छन् ।

प्रकोपको आर्थिक असर हेर्दा २०२१ सबैभन्दा विध्वंसकारी वर्ष बनेको भन्दै अर्बौं डलर बराबरको क्षति भएको क्रिश्चियन एडको प्रतिवेदनमा उल्लेख गरिएको छ ।  सबै विषम मौसमी प्रकोप जलवायुबाट उत्पन्न भएको वा जलवायुसँग जोडिएको नदेखिएको पनि प्रतिवेदनले जनाएको छ । 

अध्ययनमा समावेश गरिएका अति विध्वंसकारी मौसमी प्रकोपमध्ये अधिकांश विकसित मुलुकमा आएका थिए ।अध्ययनका क्रममा १ अर्ब ५० करोड डलरभन्दा बढी क्षति गरेका १० वटा विषम मौसमी प्रकोपको विश्लेषण गरिएको थियो । 

कहाँ के कति क्षति भए ?

अध्ययनले अगस्टमा अमेरिकामा आएको इडा नामक आँधी र जुलाईमा युरोपमा आएको बाढीबाट सबैभन्दा धेरै आर्थिक क्षति भएको देखाउँछ ।

इडा आँधीमा परी ९५ मानिसको मृत्यु र ६५ अर्ब बराबरको आर्थिक क्षति भएको थियो । साथै, जर्मनी, फ्रान्ससहितका युरोपेली मुलुकमा आएको बाढीमा २४० मानिसले ज्यान गुमाएका थिए भने ४३ अर्ब डलर बराबरको भौतिक क्षति भएको थियो ।

यसबाहेक, अमेरिकाको टेक्सासमा परेको हिमपात र लगत्तै आएको आँधीबाट २३ अर्ब र चीनको हेनान प्रान्तमा आएको बाढीबाट १७ अर्ब ६० करोड डलर क्षति भएको अध्ययनको निष्कर्ष छ । अर्बौं डलर बराबरको नोक्सानी गरेका अन्य प्रकोपमा क्यानडाको बाढी र फ्रान्सको अंगुर बगैचामा क्षति गरेको तुसारो रहेका छन् ।

यस्तै कैयौं गरीब मुलुकमा आएको बाढी र आँधीहुरीबाट ठूलो संख्यामा मानिसहरू विस्थापित भएका छन् भने मानिसहरूले गम्भीर कष्ट एवं पीडा भोगेका छन् । दक्षिण सुडानमा आएको बाढीपछि ८ लाख बढी विस्थापित भएका थिए । साथै, मे महिनामा भारत, श्रीलंका र माल्दिभ्समा आएको ताउते आँधीका कारण दुई लाख मानिस आफ्नो घर छोड्न बाध्य भएका थिए ।