बिहारको एक उद्योगमा विस्फोट हुँदा ६ जनाको मृत्यु

भारतको बिहारस्थित एक चाउचाउ उद्योगमा विस्फोट हुँदा कम्तिमा ६ जना मजदुरको मृत्यु भएको छ । आइतबार बिहारको मुजफ्फरपुरस्थित एक चाउचाउ उद्योगमा बोइलर (इन्धन वा पानी तताउने कन्टेनर) विस्फोट भएको भारतीय संचार माध्यमहरुले जनाएका छन् । 

दुर्घटनामा मृत्यु हुनेहरुको परिचय खुल्न सकेको छैन । विस्फोट निकै ठूलो भएका कारण ५ किलोमिटरसम्म आवाज सुनिएको थियो । विस्फोटलगत्तै लागेको आगो नियन्त्रण गर्न ५ वटा दमकल परिचालन गरिएको हिन्दुस्तान टाइम्सले जनाएको छ । विस्फोटमा १२ जना घाइते भएका छन् भने त्यसका कारण नजिकैका संरचनाहरुमा समेत क्षति पुगेको छ ।

दुर्घटना हुँदा कारखानामा कति जना काम गरिरहेका थिए भन्ने पनि खुल्न सकेको छैन । हाल चाउचाउ उद्योगमा उद्दार कार्य जारी रहेको छ । घटनाबारे पूर्ण विवरण आइनसकेका कारण मृतकको संख्या बढ्न सक्ने अधिकारीले बताएका छन् ।