आज ३१ औं अन्तर्राष्ट्रिय ज्येष्ठ नागरिक दिवस

आज ३१ औं अन्तर्राष्ट्रिय ज्येष्ठ नागरिक दिवस नेपालमा पनि विभिन्न कार्यक्रम गरि मनाइँदै छ । संयुक्त राष्ट्रसंघको आह्वानमा विश्वभर हरेक वर्षको अक्टोबर १ तारिखमा अन्तर्राष्ट्रिय ज्येष्ठ नागरिक दिवस मनाइन्छ । सन् २००१ देखि हरेक वर्ष ज्येष्ठ नागरिकको सम्मानमा यो दिवस मनाउन थालिएको हो । 

सरकारले ज्येष्ठ नागरिकहरुको स्वास्थ्य उपचारमा सहुलियत, गाडी भाडामा ५० प्रतिशत छुट, सरकारी कार्यालयमा लाइन लाग्न नपर्ने लगायतका सुविधा दिंदै आएको छ । यस वर्षको ज्येष्ठ नागरिक दिवसको नारा ‘सबै उमेर समूहका लागि विद्युतीय प्रविधिको प्रयोगमा समानता’ तय गरिएको छ । 

यस अवसरमा रास्ट्रपति विद्यादेवी भण्डारीले पनि शुभकामना प्रदान गरेकी छिन् । उनले राष्ट्रपति कार्यालय मार्फत आफ्नो शुभकामना सन्देश दिएकि हुन् । 

ज्येष्ठ नागरिकहरुको सम्मानमा सरकारले मासिक चार हजार रुपैयाँ भत्ता उपलब्ध गराउँदै आएको छ । तत्कालीन प्रधानमन्त्री मनमोहन अधिकारीको पालामा ज्येष्ठ नागरिकहरुलाई मासिक एक सय रुपैयाँ दिएर यसको सुरुवात गरिएको थियो। ज्येष्ठ नागरिकको सम्मान र सुरक्षाका लागि भन्दै  वि सं २०५१ सालदेखि  ज्येष्ठ नागरिक भत्ता सुरु गरिएको थियो । 

केन्द्रीय तथ्यांक विभागका अनुसार २०७८ मा ११ लाख १० हजार ज्येष्ठ नागरिक रहेको प्रक्षेपण भएको छ । जसमा साक्षरभन्दा निरक्षरको दर बढी छ। विभागले २०६८ मा गरेको जनगणनाका आधारमा ६० वर्षदेखि ६४ वर्षसम्मका उमेर समूहको साक्षरदर २६.२ प्रतिशत मात्रै छ । यस्तै, ६५ वर्षमाथिको साक्षरता दर २०.८ प्रतिशत छ। यसबाहेक १० वर्ष अघिका उक्त उमेर समूहका व्यक्तिहरू अहिले ज्येष्ठ नागरिक बनिसकेका विभागले अनुमान गरेका छन्।