सशस्त्र प्रहरीमाथि आक्रमण गर्ने पक्राउ

कञ्चनपुरमा सशस्त्र प्रहरीमाथि आक्रमण गर्ने  तस्करको समूहका एक जना भारतीय पक्राउ परेका छन् । नेपाल–भारत सीमास्थित सोमबार साँझ सशस्त्र प्रहरीमाथि आक्रमण गर्ने अर्जुन कुमारलाई भारतीय प्रहरीले पक्राउ गरेको स्थानीय प्रशासनले जनाएको हो ।

कुमारलाई पक्राउ गरेर कारबाही प्रक्रिया अघि बढाएको प्रहरीले जनाएको छ । 

कञ्चनपुरमा सीमा क्षेत्रमा खटिएका सशस्त्र प्रहरीमाथि तस्कर समूहले आक्रमण गरेको थियो । आक्रमणमा परी सशस्त्र प्रहरीका जवान सुदीप सुनारसहित तीन सशस्त्र प्रहरी घाइते भएका थिए ।

मोटरसाइकलमा चिनी तस्करी गरिरहेका वेला सशस्त्र प्रहरीले नियन्त्रणमा लिन खोजेपछि उनीहरूले सशस्त्र प्रहरीमाथि ढुंगामुढा र लाठी प्रहार गरेका थिए।

कञ्चनपुरको दोधाराचाँदनी नगरपालिका– ८ सुन्दरनगर क्षेत्रमा सशस्त्र प्रहरीमाथि आक्रमण गरेर उनीहरु भारततिरै भागेका थिए ।