पोखरामा प्रथम राष्ट्रिय ९ ए साईड भेट्रान फुटबल प्रतियोगिता सुरु हुने

बैशाख २ गतेदेखि पोखरामा प्रथम राष्ट्रिय ९ ए साईड भेट्रान फुटबल प्रतियोगिता सुरु हुने भएको छ ।

गण्डकी प्रदेश युवा तथा खेलकुद मन्त्रालयको आयोजनामा ​​पोखरा रंगशालामा आगामी वैशाख ६ गतेसम्म प्रतियोगिता हुने भएको छ ।

नयाँ पुस्तालाई खेलकुदमा लाग्न प्रेरित गर्ने र वरिष्ठ खेलाडीलाई खेलकुदमा सक्रियतापूर्वक सहभागी गराउने उद्देश्यले प्रतियोगिता आयोजना गरिएको प्रतियोगिता संयोजक दिलबहादुर गुरुङले बताए ।

प्रतियोगितामा ४० देखि ६० वर्ष उमेर समूहका खेलाडीले भाग लिन पाउने र प्रत्येक टोलीमा ५० वर्षभन्दा माथिका दुई खेलाडी समावेश गर्नुपर्ने व्यवस्था छ । प्रतियोगितामा पोखरा, काठमाडौं, वालिङ, सिमरा र हेटौंडाका १९ टोलीको सहभागिता रहने आयोजकले जनाएको छ ।

विजेता टोलीले नगद तीन लाख र उपविजेता टोलीले एक लाख ५० हजार प्राप्त गर्नेछन् । सेमिफाइनल पुग्ने दुई टोलीले ३०–३० हजार नगद पाउनेछन् ।