सभामुख र उपसभामुख चयनका बिषयमा कांग्रेसले अन्य दलहरुसँग छलफल गर्ने

काठमाडौं-प्रतिनिधिसभाको सभामुख र उपसभामुखको चयनका सम्बन्धमा नेपाली कांग्रेसले अन्य दलहरुसँग छलफल गर्ने भएको छ।

पार्टी सभापति शेरबहादुर देउवा निवास धुम्वाराहीमा बसेको पार्टी पदाधिकारी बैठकले सभामुख र उपसभामुखको निर्वाचनका बिषयमा संसदमा रहेका अन्य राजनीतिक दलहरुसंग छलफल चलाउने निर्णय गरेको सहमहामन्त्री बद्री पाण्डेले जानकारी दिए।

दलहरुसँग छलफल गरेर मात्रै सभामुख र उपसभामुखमा उम्मेद्वारीका विषयमा पार्टीले निर्णय लिने उनले बताए। राष्ट्रपति चयनका विषयमा भने पार्टीभित्र अहिलेसम्म छलफल नभएको पाण्डेको भनाइ छ।