राष्ट्रपति म्याक्रोँले गुमाए बहुमत

फ्रान्सेली संसद नेसनल एसेम्ब्लीमा इमानुएल म्याक्रोँले राष्ट्रपतिमा पुनः निर्वाचित भएको दुई महिनाभन्दा कम समयपछि बहुमत गुमाएका छन् । फ्रान्सको तल्लो सदन नेसनल एसेम्ब्लीमा निर्वाचनमा वाम गठबन्धन र अति दक्षिणपन्थीहरूको दमदार प्रस्तुतिपछि राष्ट्रपति म्याक्रोँले बहुमत गुमाएका हुन्। 

बलियो बहुमत ल्याउन मतदातालाई आह्वान गरेतापनि म्याक्रोँले नेतृत्व गरेको गठबन्धनले चुनावमा दर्जनौं सिट गुमाए जसले फ्रान्सेली राजनीतिलाई ध्रवीकरणतर्फ लैजाने देखिएको छ । अब राष्ट्रपतिलाई सुधारका योजना पारित गर्न भने समस्या पर्नेछ । 

निर्वाचनमा वामपन्थी, अति वामपन्थी र ग्रीन पार्टीहरूको नवगठित गठबन्धन दोस्रो र मारिन ल पेनले नेतृत्व गरेको अति दक्षिणपन्थी पार्टी तेस्रो बन्ने देखिएका छन् ।  यो अवस्था अप्रत्यासित भएको हालै नियुक्त गरेका प्रधानमन्त्री एलिजाबेथ बोर्नले बताइन् ।

‘ हामीले राष्ट्रिय र अन्तर्राष्ट्रिय रूपमा सामना गरिरहेका जोखिमहरूलाई ध्यानमा राख्दा पछिल्लो अवस्थाले हाम्रो देशका जोखिमको प्रतिनिधत्व गर्छ’,  उनले भनिन् ।

उनले आधुनिक फ्रान्सले यस्तो संसद कहिल्यै नदेखेको पनि बताइन्। उनले अगाडि थपिन, ‘हामीले भोलिदेखि नै बहुमत ल्याउनका लागि काम गर्नेछौं ।’