अभिनेता सलमान खानलाई ज्यान मार्ने धम्की

भारतीय अभिनेता सलमान खानलाई ज्यान मार्ने धम्की आएको छ ।​ अभिनेता खानका बुबा सलिम खान आइतबार बिहान ‘मर्निङ वाक’ जाँदा आराम गर्न बसेको बेन्चमा एउटा पत्र भेटेका थिए । सो पत्रमा सलमानलाई पनि ‘सिद्धु मुसेवाला जस्तै बनाउने’ उल्लेख गरिएको थियो।
भारतीय सरकारी समाचार एजेन्सी पीटीआईका अनुसार यो पत्रसँगै सलमानका पिता सलिमले प्रहरीमा एफआईआर दर्ता गरेका छन् । प्रहरीले एफआईआर दर्ता गरेर पत्रका विषयमा अनुसन्धान सुरु गरेको छ । बिहान साढे ७ देखि ८ को बीचमा उक्त पत्र भेटेपछि उनले प्रहरीलाई खबर गरेका थिए।
भारतको अन्तर राज्य गिरोहका नाइके भनेर चिनिने लरेन्स बिश्रोईले पाँच वर्ष अधि पनि सलमानलाई ज्यान मार्ने धम्की दिएका थिए । त्यतिबेला कालो हरिण मारेको मुद्दामा अदालत पुगेका सलमानलाइ लरेन्स विश्रोईले ज्यान मार्ने धम्की दिएका थिए । हत्या, अवैध असुली र फायरिङ लगायत घटनामा संलग्नता रहँदै आएका लरेन्स विश्रोई अहिले जेलमा छन्।
पञ्जाबको मान्सा गाउँमा गत साता गायक तथा नेता सिद्धु मुसेवालाको हत्याको जिम्मा पनि साेही समूहले लिएको छ ।