विभिन्न राष्ट्रहरूले यात्रामा प्रतिबन्ध लगाएपछि दक्षिण अफ्रिकाको आपत्ति

विभिन्न राष्ट्रहरूले दक्षिण अफ्रिकाबाट हुने यात्रामा प्रतिबन्ध लगाएपछि त्यहाँको विदेश मन्त्रालयले कोरोनाभाइरसको नयाँ भेरियन्ट पत्ता लगाएका कारण आफूलाई प्रशंसा गर्नुको साटो दण्डित गरिएको गुनासो गरेको छ । यात्रामा लगाइएको प्रतिबन्धलाई मन्त्रालयले कडा आलोचना गर्दै उत्कृष्ट विज्ञानलाई प्रशंसा गरिनु पर्ने ठाउँमा दण्डित गरिएको जनाएको हो ।  

विश्वका अन्य मुलुकहरूमा नयाँ भेरियन्ट फेला पर्दा व्यक्त भएका प्रतिक्रियाहरु यस भन्दा फरक रहेको मन्त्रालयको विज्ञप्तिमा उल्लेख छ ।

शुक्रवार विश्व स्वास्थ्य सङ्गठन(डब्ल्युएचओ) ले नयाँ भेरियन्टलाई "भेरियन्ट अफ कन्सर्न" का रूपमा वर्गीकरण गरेको थियो । प्रारम्भिक प्रमाणहरूका अनुसार ओमिक्रोनबाट सङ्क्रमण फैलिन सक्ने सम्भावना उच्च छ । यो भेरियन्ट चीनको वुहानमा देखिएको भाइरसभन्दा निकै फरक बनिसकेकाले चिन्ताजनक मानिएको छ । पहिलो प्रकारको भाइरसका आधारमा बनाइएका खोपहरू प्रभावकारी नहोलान् कि भन्ने चिन्ता वैज्ञानिकहरूमा देखिएको छ ।

कोभिड-१९ को यो नयाँ भेरियन्ट बेलायत, जर्मनी, बेल्जियम, बोत्स्वाना, हङ्‌कङ र इटलीलगायतका अन्य देशहरुमा पनि फेला परेको छ । नोभेम्बर २४ तारिखमा पहिलो पटक दक्षिण अफ्रिकाले यो भेरियन्टबारे डब्ल्युएचओ लाई जानकारी गराएको थियो ।

नयाँ भेरियन्ट देखिए पछि कुन राष्ट्रले के के नियम बनाए :

युरोपियन सङ्घ – अन्तर्गत रहेका राष्ट्र र स्विट्जरल्यान्डले सोमवारबाट अधिकांश दक्षिण अफ्रिकी मुलुकबाट हुने उडानमा रोक लगाउने निर्णय गरिसकेका छन् । दक्षिण अफ्रिका, जिम्बाब्वे, बोत्स्वाना, लसूटू र एस्वाटिनीबाट आउने यूके वा आयरल्यान्डका नागरिक वा बेलायतका बासिन्दाबाहेक अरू यात्रुलाई प्रवेशमा रोक लगाइएको छ ।

अमेरिका –  सोमवारबाट लागु हुनेगरी दक्षिण अफ्रिकासहित आठ देशबाट आउने आफ्ना नागरिकबाहेक अरू यात्रुलाई प्रतिबन्ध लगाएको छ ।

अस्ट्रेलिया – अफ्रिकी देशहरूसँगको उडान १४ दिनका लागि बन्द गरेको छ ।

जापान – अधिकांश दक्षिण अफ्रिकी देशहरूबाट आउने यात्रुलाई अनिवार्य १० दिन क्वारन्टीनमा राख्ने निर्णय गरेको छ। सो अवधिमा समयमा उनीहरूले चारवटा परीक्षण गराउनुपर्नेछ ।

भारत – दक्षिण अफ्रिका, बोत्स्वाना र हङ्‌कङ सहितका देशबाट आउने यात्रुहरूमाथि निगरानी बढाउन र परीक्षण गर्न निर्देशन दिएको छ ।

इरान – छवटा दक्षिण अफ्रिकी देशहरूबाट आउने यात्रुहरूलाई प्रतिबन्ध लगाएको छ ।

ब्रजिल -छवटा दक्षिण अफ्रिकी देशबाट आफ्नो देशमा हुने यात्रामा प्रतिबन्ध लगाएको जनाएको छ ।

क्यानडा – दक्षिण अफ्रिकी देशहरूमा विगत १४ दिनको अवधिमा यात्रा गरेका विदेशीहरूलाई प्रवेशमा रोक लगाएको छ ।

थाईल्यान्ड – आठवटा दक्षिण अफ्रिकी देशहरूबाट आउने यात्रुहरूलाई प्रतिबन्ध लगाएको छ ।

नेपाल – दक्षिण अफ्रिका क्षेत्र भएर आउने हवाईयात्रुलाई अनिवार्य क्वारन्टीन राख्ने निर्णय गरेको छ।

नेपालको दक्षिण अफ्रिकी क्षेत्रमा सीधा हवाई उडान सम्पर्क नभए पनि त्यस क्षेत्रबाट आउने र त्यस क्षेत्रलाई ट्रान्जिट पारेर आउने यात्रुलाई एक साताको क्वारन्टीन अनिवार्य गर्ने निर्णय भएको स्वास्थ्य मन्त्रालयका प्रवक्ता कृष्ण पौडेलले जानकारी दिएका छन् ।

बीबीसीबाट