चीनमा खाद्यान्न अभावका कारण आफूसँग भएको सामान साटफेर

चीनको शीआन सहरमा खाद्यपदार्थको अभाव हुँदा नगरवासीहरू आफूसँग भएको सामान साटफेर गर्न थालेका छन् । ओमिक्रोन फैलिएसँगै शीआनमा झन्डै एक करोड ३० लाख मानिस घरभित्र बस्न बाध्य छन् । लकडाउनका बेला उनीहरू खाद्यान्न किन्न पनि बाहिर निस्किन पाउँदैनन् ।

बीबीसीका अनुसार सरकारी निकायले स्थानीयहरूलाई निःशुल्क खाना उपलब्ध गराउँदै आए पनि सो प्राप्त खाना पर्याप्त नभएको बताएका छन् । केहिले भने अझै पनि सहायता पाउन नसकेको जनाएका छन् ।

केही समययता मानिसहरूले यसबारे सामाजिक सञ्जालमार्फत् गुनासो पोख्न थालेका छन् । सामाजिक सञ्जालमा सार्वजनिक सामग्रीहरूमा त्यहाँका बासिन्दाले खाद्यपदार्थ लिन आफूसँग भएको खाद्यान्न वा विद्युतीय उपकरण दिइरहेको देखिन्छ ।

चीनको सामाजिक सञ्जाल वेबोमा मानिसहरूले बन्दा र चुरोट, स्याउ र भाँडा माझ्ने तरल पदार्थ, तरकारी र स्यानिनटरी प्याड आदानप्रदान गरेको भिडियो तथा तस्बिरहरु सार्वजनिक गरेका छन् ।

शीआन सहर अहिले कोभिड-१९ महामारीको केन्द्रबिन्दुमा छ । त्यहाँका स्थानीय निकायहरूले सङ्क्रमण नियन्त्रणका लागि कडा नियमहरू लागु गरे सँगै सामाजिक सञ्जालमा आलोचनाको विषय बनेको छ । यहाँ फैलिएको सङ्क्रमण चीनले महिनौँपछि भोगेको सबैभन्दा खराब अवस्था भएको बताईएको छ । 

यसैगरी मङ्गलवार तीन लक्षणविहीन मानिसमा सङ्क्रमण पुष्टि भएपछि अधिकारीहरूले दोस्रो सहरमा पनि पूर्ण लकडाउन गराएका छन् । शीआनबाट ५०० किलोमिटर टाढा रहेको सहर युझाउका करिब ११ लाख मानिसलाई घरभित्रै बस्न निर्देशन दिइएको छ।