एक लाख ४४ हजार ४१६ जना उम्मेदवारले स्थानीय तहको निर्वाचनका लागि मनोनयन दर्ता गरे

एक लाख ४४ हजार ४१६ जना उम्मेदवारले स्थानीय तहको निर्वाचनका लागि मनोनयन दर्ता गरेका छन्। निर्वाचन आयोगले अपरान्ह १२ :३० बजे सार्वजनिक गरेको तथ्याङ्कअनुसार प्रदेश नं १ मा २२ हजार ४७०, मधेसमा ३६ हजार ३७७, बागमतीमा २३ हजार९२६, गण्डकीमा १२ हजार ५४७, लुम्बिनीमा २२ हजार ७६६, कर्णालीमा १३ हजार १२६ र सुदूरपश्चिम प्रदेशमा ११ हजार २०४ जनाले उम्मेदवारी दर्ता गराएका छन् । 

नगरपालिकाको प्रमुखमा ३ हजार ३७५ र उपप्रमुखमा २ हजार ३६४ ले उम्मेदवारी दर्ता गराएका छन् । गाउँपालिका अध्यक्षमा ३ हजार ३३४, उपाध्यक्षमा २ हजार ३६४ र वडाध्यक्षमा ३३ हजार ७९७ ले मनोयन दर्ता गराएका छन् । २४ हजार ७९२ महिला सदस्य, २२ हजार ४४० महिला दलित सदस्य र ५२ हजार २४५ सदस्यको मनोनयन दर्ता भएको छ । 

उत्साहका साथ आइतबार र सोमबार देशभरका स्थानीय तहका निर्वाचन अधिकृतको कार्यालयमा मनोनयन दर्ता भएको छ । ७५३ स्थानीय तहका प्रमुख, उपप्रमुख, अध्यक्ष र उपाध्यक्ष, ६ हजार ७ सय ४३ वडाध्यक्ष, सोही संख्यामा महिला सदस्य र दलित महिला सदस्य र १३ हजार ४८३ सदस्य गरी कुल ३५ हजार २ सय २१ सदस्यका लागि वैशाख ३० गते निर्वाचन हुँदैछ ।